Tuesday, 22 August 2017

ZIARA YA SIKU TANO YA RAIS DK.JOHN MAGUFULI MKOANI TANGA ILIKUWA HIVI,,,


Pichani ni rais Dkt.John Pombe Magufuli akiwa katika ziara yake ya siku tano mkoani tanga akiwahutubia wananchi. 

NA SOPHIAWAKATI,TANGA
RAIS wa jamhuri ya muungano wa Tanzania Dk. John Pombe Magufuli amemtaka Waziri wa viwanda Charles Mwijage kuto kuwafumbia macho dhidi ya wawekezaji wasioendeleza viwanda walivyouziwa badala yake amemuagiza kuwanyang'anya na kugaiwa kwa watu wengine. 

Aliyasema hayo jana alipokiwa kwenye ziara yake ya kutembelea baadhi ya viwanda Jijini Tanga akitanabaisha kwamba hapo awali nchi ya Tanzania ilichezewa kwa watu kuuziwa viwanda kwa mtindo wa kufahamiana huku wakikosa kuviendeleza hivyo kuleta hasara. 

Mbali na kutoa maagizo hayo kwa waziri Mwijage, Rais Dk. Magufuli alimpongeza mwekezaji wa kiwanda cha saruji Kilimanjaro kwa kutoa ajira 180 huku akielezea kuridhishwa na GBP kutoa ajira 1000 sanjari na Tanga Fresh kuwezesha wafugaji 6000 kuuza maziwa na kuweka mkakati wa upanuzi wa kiwanda chao. 

Alipokuwa akizungumzia suala la wawekezaji wasioendeleza viwanda kunyang'anywa Rais Dk. Magufuli alisema utaratibu uliotumika kuvitoa viwanda hivyo alioueleza kuwa wa kirafiki umeua viwanda vingi hadi Korona za mashamba ya mikonge ambazo ni mali ya watanzania. 

Alisema kwamba lengo la serikali kujenga viwanda ni ili kupata kodi na wananchi wake waweze kupata ajira jambo ambalo halikuweza kuonekana katika kipindi kirefu. 

Katika taarifa yake kwa Rais meneja wa kiwanda cha Tanga Fresh,Michael Karata alisema licha ya kufanikiwa kutoa ajira kwa asilimia 42 wananchi ni wabia wa kiwanda hicho cha maziwa. 

Aidha Karata alisema wanakabiliwa na changamoto huko TRA walikokwenda kusajili hati walitozwa faini jambo ambalo limekuwa kikwazo kwao katika kufanya upanuzi wa kiwanda chao. 

Rais Dk.Magufuli katika majibu yake juu ya changamoto hiyo alisema kwa kuwa Tanga Fresh ni watu wa tatu kununua kiwanda hicho hawapaswi na deni hilo badala yake ameagiza Azania kubanwa walipe fedha hizo husika. 

Kabla ya Rais kutoa kauli hiyo waziri Mwijage alimweleza kuwa Tanga Fresh ilipofika hapo ilikuwa ni mkono wa tatu baada ya kuachiwa na kampuni ya Azania. 

Katika ziara hiyo ambayo Rais Dk. John Magufuli alitembelea viwanda alisema sura ya Tanga iliyopotea miaka 20 iliyopita imeanza kurejea huku sababu kuu ya kufa kwake akiitaja kuwa ni baadhi ya wawekezaji wasioitakia mema Tanga kutoviendeleza. 

Alisema wawekezaji hao walidiriki kujipatia fedha kwenye taasisi mbalimbali na kwenda kuwekeza maeneo mengine huku akisisitiza kusema kuwa hadhi ya uchumi mkoani Tanga imeanza kurejea. 
Mwisho. 


Picha ni rais Dk.John Magufuli akiwa kwenye moja ya ziara yake ya kutembelea viwanda viwand vitatu,akiwa kituo cha mafuta GBP jijini Tanga.

NA SOPHIA WAKATI,TANGA
RAIS Dk. John Pombe Magufuli ameelezea kusikitishwa kwake na baadhi ya wawekezaji ambao wameshindwa kuendeleza viwanda akisema wameshindwa kuitendea haki serikali ya Tanzania. 

Hata hivyo,amesema kuwa wawekezaji wa aina hiyo wamesababisha miongoni mwa viwanda 72 hapa nchini kufa huku vichache vikiendelea kujikongoja kwa uzalishaji bidhaa mbalimbali. 

Kauli hiyo ameitoa juzi wakati akiweka jiwe la ufunguzi kiwanda cha kuzalisha Saruji Kilimanjaro huku akimuagiza waziri wa viwanda,Charles Mwijage kuchukua hatua dhidi ya viwanda vilivyoshindwa kuendelezwa. 

Akionyesha msisitizo juu ya hatua yake hiyo ya kumuagiza waziri Mwijage,Rais Dk. Magufuli akitolea mfano kwamba hata mwenzake waziri,William Lukuvi ameweza kuorodhesha mashamba yote yasiyoendelezwa na kufutiwa hati. 

Akihimiza uwepo wa viwanda vya ndani Rais Dk. Magufuli alimtaka waziri huyo,Mwijage kufuatilia nchi jirani kuhakikisha kuna bidhaa za Tanzania yakiwemo maziwa akisema kama itajitokeza kukataliwa kuuza basi nao wasiuze hapa nchini. 

Rais Dk. Magufuli alisema kuwa awali nchi ilikuwa na viwanda 197 lakini kuna baadhi ya watu wamevichukua kwa bei nafuu sawa na bure huku wakienda kudiriki kukopa fedha ndani na nje ya nchi na kuvitelekeza. 

"Baadhi ya wawekeza hawakuitendea haki Tanzania na kupelekea kubaki na viwanda 11 Afrika huku vingine vikijikongoja kwa uzaliahaji "alisema Rais Dk Magufuli. 

Kwa upande wake meneja masoko kiwanda cha Kilimanjaro,Hashim Hafidhi alisema kiwanda hicho kimeanzishwa 2013 kwa kuanza na wafanyakazi 40 ambapo sasa ajira zilizotolewa ni 189 kwa kutoa mafunzo kama teknolojia ya umeme. 

Vilevile Hafidhi alisema kuna changamoto mbalimbali zinazowakabili akishauriwa kupunguziwa mzigo wa kodi japo kwa miaka kumi kutokana na kiwanda hicho kuwa kipya huku kukiwa na saruji kutoka Pemba na Unguja kunusuru soko la ndani. 

Mwisho. 

Pichani ni viongozi mbalimbali wakiwemo mawaziri wakijibu hoja mbalimbali kwenye ziara hiyo ya rais.



Sunday, 20 August 2017

WANACHAMA WA TIMU YA COASTAL UNION WAMEKUTANA LEO KUWEKA MKAKATI MADHUBUTI,,,

NA SOPHIA WAKATI,TANGA
KLABU ya Coastal Union yenye maskani yake Jijini Tanga, imezika tofauti walizokuwa nazo awali zilizosababisha timu hiyo ishuke kutoka Ligi kuu ya Tanzania Bara msimu wa mwaka 2014/ 2015, na sasa timu hiyo imeunda umoja wa viongozi utakaokuwa na lengo la kuirejesha Ligi Kuu msimu ujao.

Akizungumza LEO saa tano asubuhi kwenye mkutano wa wanachama uliofanyika makao makuu ya klabu hiyo barabara ya 11 Jijini hapa, Mwenyekiti wa kamati ya mashindano, Ahmed Hilal maarufu ‘Aurora’ alisema kutokana na kikao kilichofanyika katika hoteli ya Mkonge, kimezika tofauti hizo na sasa wapo pamoja.

Alisema miongoni mwa watu waliohudhuria mkutano huo uliorudisha umoja ni pamojana,Nassor Binslum ambaye ataisaidia tena klabu hiyo pamoja na watu wengine ili kuhakikisha timu hiyo itakayoshiriki Ligi Daraja la kwanza iweze kurejea Ligi Kuu.

“Kiukweli mkutano uliofanyika Mkonge Hoteli umezika tofauti zote ambazo zilijitokeza awali na tumeunda umoja ambao umewezesha timu yetu kusajili wachezaji watakaokuwa na uwezo wa kupanda daraja,Tunachotaka sasa watu wote wajali Coastal kwanza mambo mengine ya baadaye,” alisema Aurora.

Hata hivyo,Coastal iliteremka daraja baada ya viongozi kuhitafiliana na  Aurora akiwa Mwenyekiti aliyeipandisha daraja timu hiyo msimu wa 2011-2012 alijiuzulu wadhifa huo na baadaye timu kufanya uchaguzi uliomweka madarakani Dk. Ahmed Twaha ambaye aliishusha daraja akiwa na katibu wake Kassim El-Siagi na Akida Machai.

Mgogoro huo ulisababisha baadhi ya watu kwenda kujiunga na timu ya Mgambo JKT ambayo nayo ilishuka daraja hadi la kwanza huku wanachama wengine wakienda katika timu hiyo ambapo zote mwaka jana ziliposhiriki ligi daraja la kwanza hazikufanya vizuri.

“Tumesameheana kabisa na sasa tupo pamoja, tusianze kunyoosheana vidole na kufukua makaburi yaliyipita hatutafika tunapotaka kwenda lakini lazima mkumbuke mpira sasa ni fedha…Nawakumbusha pia lipeni ada zenu muwe na sauti kwa viongozi hawa,” alisema Aurora.

Makamu Mwenyekiti wa timu hiyo,Mohamed Musni, alisema kwamba hivi sasa uongozi wa klabu hiyo umepanga kuhakikisha inafanya vizuri katika Ligi daraja la kwanza itakayoanza mwezi ujao ili waweze kurejea kwa kishindo Ligi Kuu.

Nae Mjumbe wa kamati ya utendaji ya timu hiyo Abdallah Zuberi ‘Unenge’, aliwataka wanachama kuhakikisha wanaacha majungu ya kupeleka habari zitakazowarudisha kule walipotoka na badala yake wahubiri umoja kwa faida ya timu hiyo.

Kwa upande wake kaimu Katibu Mkuu,Nassoro Kibabedi, alitumia nafasi hiyo kwa kuwataka wanachama waisaidie timu hiyo katika kipindi hiki na kamwe wasibweteke wakiamini kwamba wafadhili watafanya kila kitu hivyo walipeada zao ili ziweze kuisaidia klabu hiyo.
Mwisho.

NA SOPHIA WAKATI,TANGA
TIMU ya soka ya Coasta Union ya Jijini hapa, itaanza mazoezi kesho (Jumanne) kwenye uwanja wa Mkwakwani kujiwinda na Ligi Daraja la Kwanza (FDL), inayotarajiwa kuanza mwezi ujao huku ikitangaza nyota wake wapya iliyowasajili msimu huu.

Mwenyekiti wa Kamati ya Usajili ya timu hiyo,Ahmed Hilal maarufu ‘Aurora’, alisema kazi ya usajili haina rahisi kutokana na kwamba kabla hawakuwa na fedha hivyo baada ya kurudisha umoja wameweza kusajili wachezaji wadhoefu watakaowasaidia kupanda daraja msimu huu.

Aurora aliwataja baadhi ya wachezaji wapya kuwa ni pamoja na mchezaji wa zamani wa timu ya Taifa ‘Taiufa Stars’, Simba na Yanga Athumani Idd ‘Chuji’, Hussein Sharrif ‘Cassilas’, Salvatory Ntebe kutoka Ndanda FC, Ramadhani Hassain kutoka Mbeya City, Maulid Rajab ‘Mau’ African Sports, Hilal Juma Mtibwa, Ramadhani Mussa Pamba, Ibrahim Ndanda, Baraka Jafar na Omary Salum kutoka African Lyion.

Huku wachezaji wengine ni pamoja na mfungaji bora wa Ndondo Cup iliyomalizika hivi karibuni Jijini Dar es salaam Rashid Roshi, Exavery Emanuel, Rahim Aziz Afrikan Lyion, Sagaf  Kabaki, Bakari Mtwiku, Bakari Nondo, Said Jeilani na Abubakari Kinanda ‘Mapara’ kutoka malindi ya Zanzibar.

Katibu wa klabu hiyo,Nassor Kibabedi alisema mazoezi yataanza kesho kwenye uwanja wa Mkwakwani asubuhi kishajioni yatafanyika kwenye uwanja wa shule ya sekondari Galanos ambako mwalimu atakuwa Joseph Lazaro.
Mwisho.

Tuesday, 25 July 2017

ZIARA YA WAZIRI WA ARDHI,NYUMBA NA MAENDELEO YA MAKAZI,LUKUVI ILIKUWA HIVI MNAZI,,

 Pichani katikati ambaye amesimama na kushika karatasi na kipaza sauti mwanaume ni Waziri wa Ardhi, Nyumba na Maendeleo ya Makazi, William Lukuvi akiwahutubia wana nchi wa Mnazi wilayani hapo mara baada ya kufanya ziara ya kutembelea shamba hilo linalo ungani vijiji vitatu vya Mbaramo,Shaghayu tarafa ya Umba na Mnazi wilayani Lushoto,mkono wa kulia ni mbunge wa jimbo la Mlalo Rashid Shangazi na mkono wa kushoto ni mkuu wa wilaya hiyo January Rugangika.

NA SOPHIA WAKATI,LUSHOTO
SERIKALI imesema inakusudia kulifutia hati shamba la mkonge la Mnazi Sisal Estate lililopo katika kata ya Mnazi kwa kile kilichoelezwa mwekezaji kushindwa kufuata taratibu zilizopo ikiwemo sheria namba tano ya matumizi bora ya ardhi.
Hata hivyo,imesema haitakuwa tayari kumvumilia mwekezaji ambaye atatumia teknorojia ya zamani na kuwa kikwazo cha ajira kwa wananchi wake huku lengo likiwa kufikia adhima ya rais Dk.John Magufuli kuifanya Tanzania kuwa nchi ya viwanda.

Waziri wa Ardhi, Nyumba na Maendeleo ya Makazi, William Lukuvi alitoa kauri hiyo juzi wilayani hapo mara baada ya kufanya ziara ya kutembelea shamba hilo linalo ungani vijiji vitatu vya Mbaramo,Shaghayu tarafa ya Umba na Mnazi wilayani hapo.

Baada ya kufuatia wamiliki wa kampuni ya Le-Marsh Enterprises ya nchini Kenya, kushindwa kulipa kodi ya ardhi tangu wamilikishwe shamba hilo mwaka 1997 pamoja na kushindwa kuliendeleza kutoa ajira kwa wananchi. 


Waziri,Lukuvi amesema amejiridhisha mbali ya kupokea malalamiko mbalimbali ikiwemo barua ya wananchi atamwandikia taarifa Rais Dk.John Magufuli kuonesha dhamira ya serikali ya kulifutia hati shamba hilo ili liweze kurejeshwa mikononi mwa serikal baada ya mmiliki wake kushindwa kuendana na masharti ya mkataba wa shamba wa umiliki wao.

Shamba hilo linamilikiwa na Wakenya wawili waliokuwa pamoja na watanzania wawili, lakini kwa mujibu wa waziri alisema kwamba watamshawishi Rais afute hati ya shamba hilo kutokana na kwamba wameshindwa kuliendeleza kwa kutumia mashine zile zile za mwaka 1951, lakini pia wameshindwa kulipa kodi ya serikal ya ardhi tangu mwaka 2012.

Alisema kuwa serikali ya awamu ya tano ilipoingia madarakani iliunda kamati kila mkoa kufuatilia mashamba ambayo wawekezaji wameshindwa kuyaendeleza ambapo mkoani Tanga katika mashamba yaliyotembelewa mwaka jana rais aliyafutia mashamba matano katika wilaya za Korogwe na Muheza hivyo kuna uwezekanomkubwa kwa shamba hilo kufutiwa.

Hata hivyo,Waziri alimuuliza mmiliki wa shamba hilo Lawrence Macharia kwamba amekuwa akipata kiasi cha shilingi ngapi kwa mwaka ambapo alimwambia waziri kwamba pamojana gharama zote wanazotoa hupata kiasi cha shilingi bilioni 1 kwa mwaka jambo ambalo lilimsikitisha Waziri kuona ni kwanini wameshindwa kulipa kodi ya ardhi ya serikali kwa kipindi chote hicho.

Lukuvi alisema kwamba wakati shamba hilo wakilimiliki mweaka 1997 kodi ya ardhi kwa mwaka ilikuwa ni sh. 200 ambapo ikapanda hadi sh 400 na sasa serikali inatoza kiasi cha sh. 1,000 kwa mwaka kama kodi ya ardhi kwa sheria namba 5 ya ardhi.

"Mwekezaji hatulichukui shamba hili kwa sababu wewe ni Mkenya, tutachukua hatua kwa mujibu wa sheria ya ardhi na matakwa ya kisheria ya kituo cha uwekezaji hapa nchini,tuliwapa mashamba haya ili mlete teklonojia mpya, mjenge viwanda kwa mazao yatokanayo na mkonge"alisema Lukuvi.

Waziri alisema kuwa lakini pia muajiri wafanyakazi mlipe kodi ya serikali lakini yote hayo hayafanywiki kwa mwekezaji wa kiwanda hicho huku wananchi wakikosa ajira na serikali kukosa mapato yake ya ardhi.

Nae Mkurugenzi Mtendaji wa halmashauri ya wilaya ya Lushoto,Kazimbaya Makwega, alimueleza waziri kwamba kwenye kikao cha Kamati ya Ushauri cha mkoa wa Tanga (RCC) kupitia mkuu wa mkoa wake Martine Shigela waliagiza mashamba ambayo wamiliki wanashindwa kuyaendeleza wasitishe shughuli mbalimbali katika mashamba hayo.

Mbali ya kikao hicho ziko hatua mbalimbali kama halmashauri zilifikiwa ikiwemo kumpatia mwekezaji notisi ya siku tisini ili kuweza kujirekebisha kujitokeza ikiwemo kulipa kodi ya ardhi ya shamba hilo,kitu ambacho hakutekeleza.

"Licha ya kupata maelekezo kumwaandikia barua kwa baada ya kupata maelekezo ya kikao cha RCC, lakini pia tuliwakamata wafanyakazi wa shamba hili wakihujumu miundombinu, walikuwa wanataka wang'oa njia ya reli, kesi ipo polisi," alisema mkureugenzi huyo baada ya mmiliki wa shamba hilo kumweleza waziri kwamba wameshindwa kuliendeleza baada ya kupata taarifa kwamba shamba hilo tayari limechukuliwa na serikali.

 Huku Diwani wa kata ya Mnazi,Zuberi Shechambo alipopewa nafasi ya kueleza alisema kwamba mwaka 2002 alikuwa mwenyekiti wa kijiji cha Mnazi mwekezaji huyo alitaka kung"oa korona hiyo kwa lengo la kuiuza  ambapo alimzuia na kupelekea kuwepo mpaka leo.

Kwa upande wake Mbunge wa jimbo la Mlalo,Rashid Shangazi, alimpongeza rais pamoja na waziri huyo kutokana na jitihada wanazozifanya kuwasaidia wananchi na kwamba anayoimani kubwa kwamba shamba hilo serikali italichukua na hivyo kuondoa kero ya muda mrefu ya wananchi wanaozungukwa na shamba hilo kukosa maeneo ya ujenzi wa nyumba, mashamba pamoja na huduma za jamii.

Hata hivyo,waziri Lukuvi alitumia nafasi hiyo kwa kuwataka viongozi kuanzia ngazi ya vijiji kwa kushirikiana na wananchi kuendelea kuwa walinzi kulitunza shamba hilo mpaka pale serikal itakapo fikia muafaka na kulipangia matumizi bora ya ardhi.
Mwisho.
Hii ndio korona ya tangu mwaka 1937 ambayo ni chakavu ilikutwa ikitumiwa na kiwanda hicho.

Tuesday, 27 June 2017

OFISA UHAMIAJI MKOANI TANGA,,CRISPIN NGONYANI AKIELEZA JINSI WALIVYOFANIKIWA KUWANASA WAHAMIAJI HARAMU AMBAO WALIFICHWA KWENYE MASHAMBA YA WANANCHI NA KUHARIBU MAZAO,,,


 Pichani ni Mkuu wa Idara ya uhamiaji mkoani Tanga,Crispin Ngonyani akizungumza na waandishi wa habari hawapo pichani juu ya tukio lililotokea juzi saa 3:30 asubuhi baada ya taarifa kutoka kwa raia wema waliowafahamisha maafisa uhamiaji ambao walikuwa wakiwajibika kwenye mpaka wa Horohoro ambapo waliwafuatilia wahamiaji hao.

NA SOPHIA WAKATI,MKINGA
WAETHIOPIA 45 wamekamatwa wakiwa wamejificha kwenye mashamba ya Wananchi huko kijiji cha Horohoro wilayani Mkinga mkoani Tanga ambapo walikuwa wakimsubiri mtu aliyekuwa akiwatorosha wakati wa kifanya safari yao ya kuelekea Afrika kusini walikodai kuwa wanakwenda kutafuta maisha.

Mkuu wa Idara ya uhamiaji mkoani Tanga,Crispin Ngonyani amesema kuwa tukio hilo limetokea saa 3:30 asubuhi baada ya taarifa kutoka kwa raia wema waliowafahamisha maafisa uhamiaji ambao walikuwa wakiwajibika kwenye mpaka wa Horohoro ambapo waliwafuatilia wahamiaji hao.

Alisema,wahamiaji hao baada ya kukamatwa walisema walikuwa kwenye mashamba hayo wakiwa wanamsubiri aliyekuwa akiwasafirisha ambaye alikuwa akikagua njia ili kuweza kupita pasipo kutiwa nguvuni ambapo taarifa zinaeleza kuwa kwenye maeneo hayo waliharibu mazao ya wananchi.

Mkuu huyo wa Idara ya uhamiaji alisema kwamba raia hao wa Ethiopia kwenye mashamba hayo walikutwa wakivuna mahindi mabichi na kuyala mazingira ambayo huenda yakawa yamesababishwa na njaa ambayo ilikuwa ikiwakumbua ndipo wananchi kuwafahamisha askari ambao waliwakamata.

Aidha mkuu huyo wa uhamiaji alisema,vitendo vya uhamiaji usiozingatia sheria limekuwa likiongezeka ambapo jitihada zitaendelea kufanywa kuwapatia elimu wananchi ili kusaidiana na serikali kupiga vita matukio ya aina hiyo ambayo kwa upande mwingine yanaweza kuchangia kuhatarisha usalama.

Kwa mujibu wa afisa huyo,Ngonyani alibainisha imekuwa ni kawaida kwa Waethiopia hao kudai wanapita kama njia kwenda Afrika kusini kwa ajili ya kutafuta maisha ambapo ameishauri jamii kuendelea kushirikiana kwa karibu na uhamiaji lengo likiwa kuondosha kabisa vitendo hivyo visivyozingatia misingi ya sheria.

Hata hivyo,pamoja na kiongozi huyo wa uhamiaji alisema kwamba wapo baadhi ya watu ambao wanajihusisha na kuishi nchini kinyume na taratibu za sheria baada ya vibali vyao kuisha muda ambapo amewasihi watu wa namna hiyo kufuata taratibu kabla hawajabainika na kuchukuliwa hatua za kisheria ikiwemo ile ya kulipa faini na kufungwa jela.

Vilevile alisema kwamba katika kuhakikisha kuwa wanadhibiti vitendo hivyo idara ya uhamiaji mkoani Tanga imeweka Vizuizi barabarani maeneo ambayo upekuzi hufanyika lengo likiwa kuwabaini wahamiaji hao wasiozingatia sheria huku akiwasihi wale ambao vibali vyao vimeisha kufuata utaratibu stahiki.

Hata hivyo,pia alitumia nafasi hiyo kwa kuwataka wananchi wanaoshi pembezoni mwa mpaka wa nchi jirani Kenya kuendelea kuwaamini na kutoa ushirikiano lengo likiwa kudhibiti vitendo vya uhamiaji mkoani hapo.
Mwisho.

HAFLA YA UFUNGUZI WA MADARASA MATATU SHULE YA MSINGI KIWANDA WILAYANI MUHEZA ULIKUWA HIVI,,


Pichani ambaye amesimama ameshika kipaza sauti ni mbunge wa jimbo la Muheza,Adadi Rajabu juzi akielezea jinsi alivyofanikiwa kufanikisha ujenzi ea madarasa matatu ya shule ya msingi Kiwanda kwa kushirikiana na wadau wa maendeleo wilayani hapo baada ya kusikiliza kilio chake juu ya shule hiyo.

NA SOPHIA WAKATI,MUHEZA
MBUNGE wa Jimbo la Muheza CCM,Adadi Rajabu amefanikisha ujenzi wa vyumba vitatu vya madarasa ya shule ya msingi Kiwanda kata ya Tongwe hatua ambayo imesaidia kuboresha miundombinu hiyo ya  elimu pamoja na kuwahakikishia usalama wanafunzi waliokuwa wakisoma kwenye majengo mabovu.

Hayo yamebainika jana kwenye hafla fupi ya kukabidhiana majengo hayo ambapo Mbunge huyo alieleza kwamba lifikia uamuzi wa kuijenga shule hiyo baada ya kufanya ziara kwenye eneo hilo na kubaini kwamba ilikuwa chakavu kwa majengo yake kuwa mabovu na hivyo kuhatarisha usalama wa watoto.

Ili kufanikisha ujenzi huo mbunge huyo alichangia kiasi cha Tsh 9.4 milioni huku halmashauri na wananchi nao wakichangia ambapo hadi mradi huo wa ujenzi kukamilika zilitumika Tsh 26,470,800/= huku wafadhili Muheza Development Trust Fund ‘MDTF’ ukiwezesha kupatiakana kwa Tsh 9.8.

“Baada ya kukuta shule ni chakavu niliagiza ivunjwe haraka ili kuimarisha usalama,nikawatafuta wadau Muheza Developmnt Trust Fund MDTF kuomba ufadhili wa ujenzi huo wakatoa Tsh 9.18 milioni huku halmashauri wakitoa Tsh 10.4 na wananchi nguvu kazi,naomba myatunze majengo haya”alisema.

Aidha mbunge huyo alisema kwamba kukamilika kwa mradi huo na mingineyo wilayani Muheza ni matokeo ya ushirikiano wa karibu na wananchi sambamba na wadau wengine huku akielezea kufanikiwa kujenga Visima vya maji vipatavyo 25 na hivyo kupunguza changamoto ya upungufu wa maji.

Awali akizungumza kwenye hafla hiyo mwalimu mkuu wa shule hiyo,Elia Chamungwana alisema shule ilijengwa  1924 na kanisa la Anglikana ambapo ilitumika kama chuo cha ualimu na mwaka 1992 chuo kilihamishiwa Korogwe ambapo sasa shuleni hapo kuna upungufu wa walimu 3 na matundu ya vyoo.

Vilevile alisema kuwa hali ya chakula shuleni sio nzuri ambapo wazazi wanachangia kiasi cha kilo mbili za mchele kwa miezi mitatu utaratibu ambao utaendelea huku akisistiza kusema kwamba hali hiyo itabadilika katika kipindi hiki ambacho mavuno yataanza kupatikana baada ya msimu huu wa mavuno.

Kwa upande wake mwenyekiti wa MDTF Farough Baghoza alisema kwamba hatua hiyo ni sehemu ya jitihada za Serikali katika kuunga mkono jitihada za Rais kufikisha huduma za msingi kwa sehemu kubwa ya jamii akisema amefarijika kuona watoto wa kitanzania wanapata eneo stahiki la kuweza kujifunzia.

Kwa mujibu wa Baghoza shirika la MDTF limeonyesha dhamira ya dhati katika kuwahudumia ambapo lengo la Rais linaungwa kwa mkono ikiwemo sera ya elimu bila malipo kwa watoto wa kitanzania ambapo aliwasihi wazazi kushirikiana kwa karibu na walimu kuhakikisha watoto wanasoma vyema.
Mwisho.
 Pichani katikati ni mkuu wa moa wa Tanga,Martin Shigella,kushoto ni mbunge wa jimbo la Muheza Adadi Rajabu,akifuatiwa na mwenyekiti wa CCM wilaya hiyo Peter Jmbele,na mkono wa kulia mwanamke ambaye amevaa baibui jeusi ameshika karatasi ni mkuu wa wilaya ya Muheza Mwanasha Tumbo akifuatiwa na katibu tawala mkoa wa Tanga,Zena Said wakifuatilia wasanii wakitoa burudani mbalimbali juzi katika hafla ya ufunguzi wa ujenzi wa vyumba vitatu vya madarasa shule ya msingi Kiwanda wilayani Muheza..
 Pichani ambaye amevaa kazu amesimama ameshika karatasi ni mwenyekiti wa MDTF,Farough Baghoza alipopewa nafasi akieleza kwamba hatua hiyo ni sehemu ya jitihada za Serikali katika kuunga mkono jitihada za Rais kufikisha huduma za msingi kwa sehemu kubwa ya jamii akisema amefarijika kuona watoto wa kitanzania wanapata eneo stahiki la kuweza kujifunzia.

 Pichani ambaye amesimama ni mkuu wa mkoa wa Tanga,Shigella akiwahutubia wananchi wa kiwanda wilayani Muheza.
 Mkuu wa mkoa akimkabidhi cheti mwenyekiti wa MDTF miongoni mwa wadau waliofanikisha ujenzi huo.
 Pichani kushoto ni mkurugenzi wa halmashauri ya Muheza,Luiza Mlelwa akiwasalimia viongozi mbalimbali mara baada ya kukabidhiwa cheti kwa kufanikisha na ufuatiliaji wa ujenzi huo.
 Pichani ni baadhi ya wananchi wa kijiji cha kiwanda wakiwasikiliza viongozi siku ya hafla ya ufunguzi wa madarasa hayo.
 Pichani ambaye amesimama ni mkuu wa wilaya ya Muheza,Mwanasha Tumbo awali ofisini kwake akiwasilisha taarifa yake kwa mkuu wa mkoa wa Tanga akiwa na viongozi mbalimbali.
 Pichani ni mkuu wa mkoa wa Tanga,Akifungua madarasa hayo.
Pichani ni mkuu wa mkoa akiwa kwenye picha ya pamoja na viongozi mbalimbali na baadhi ya watoto 42 wa darasa la awali mara baada ya kulifungua.



Friday, 23 June 2017

RPC TANGA,WAKULYAMBA APIGA MARUFUKU DISKO TOTO NA WATU KUOGELEA FUKWE AMBAZO SIO RASMI EID ELFITRI MKOANI HAPO,,

 Pichani ni kamanda wa polisi mkoani Tanga,Benedict Wakulyamba akizungumza na waandishi wa habari hawako pichani kuelekea s/kuu ya Eid elfitri ,

NA SOPHIA WAKATI,TANGA
JESHI la polisi mkoaniTanga,limepiga marufuku watu wanaojiandaa kuendesha disko toto katika kumbi mbalimbali za starehe wakati huu wa kuelekea sikukuu ya Eid elFitri mkoani hapo,huku likiwataka waache kufanya hivyo vinginevyo watachukuliwa hatua za kisheria.

Akizungumza na waandishi wa habari leo ofisini kwake,Kamanda wa polisi mkoa wa Tanga,Benedict Wakulyamba, alisema kuwa jeshi lake limejipanga kuweka ulinzi katika maeneo ya kumbi za starehe, nyumba za ibada pamoja na fukwe za bahari wakati huu wa sikukuu.

TumetoamaelekezokwawananchiwetuwotemkoaniTanga, kwambatumepigamarufukukuendeshadisko Toto katikamaeneoyoteyamkoa,anayefanyamaandaliziaachemaramoja, mambo hayonikinyume cha maadili yetu lakini pia ni kinyume cha sheria,”alisemaKamandahuyo.

Pia kamanda huyo wa polisi alisema kuwa ni marufuku kwa watoto kukutwa wakiogelea bila ya kuwa na wazazi au walezi watakaowaangalia katika sikukuu na kwamba kufanya hivyo wakikutwa wazazi ndiyo watawajibika kwa kushitaki kwa vyombo vya kisheria.

Kamanda huyo alisema pamoja na watoto kukatazwa kuogelea lakini pia watu wazima wametakiwa waache mara moja kwenda kuogelea katika maeneo ambayo hayajatengwa rasmi kwa watu kuogelea na badala yake wakaogelee katika maeneo maalum yanayojulikana.

Hata hivyo,Kamanda huyo pia alihadharisha wazazi wawe makini katika kutunza na kuwalea watoto wao katika kipindi hiki cha sikukuu na kwambae ndapo kutaokotwa mtoto amepotea,mzazi atawajibika kisheria na kupotea kwake mtoto huyo.

“Kiukweli tunatoa angalizo kwa wazazi wawe makini na watoto katika sherehe hizi za Eid elFitri,mtoto akipotea mzazi atawajibika yeye mwenyewe sababu jukumu la kuleana kutunza mtoto ni la mzazi, sasakwaniniumuachehadiapotee,” alisema Kamandahuyo.

Katika hatua nyingine jeshi hilo limetoa wito kwa madereva wa vyombo vya moto kuahakikisha wanazingatia sheria za usalama barabarani katika kipindi hiki cha sikukuu ikiwemo kujiepusha na unywaji wa pombe huku wakiendesha vyombo hivyo kwa kuata sheria iliyopo.
Mwisho.

Sunday, 11 June 2017

UFUNGUZI WA MAFUNZO YA SIKU SABA JUU YA USALAMA BARABARANI 2017 WILAYANI MUHEZA ILIKUWA HIVI KWA WAENDESHA BODABODA,,,

Pichani mkono wa kushoto ambaye amesimama ameshika kipaza sauti ni kamanda wa polisi mkoa wa Tanga,Benedict Wakulyamba akiwa kwenye ukumbi wa mikutano Tareku wilayani Muheza akifungua mafunzo ya siku saba kwa waendesha bodaboda wilayani hapo,katikati ni mkuu wa kitengo cha usalama barabarani mkoani hapo,Nassoro Sisiwaya mkono wa kulia ni katibu wa bodaboda wilaya ya Muheza,Francis Gerad.

NA SOPHIA WAKATI,MUHEZA
KAMANDA wa Polisi mkoani Tanga,Benedict Wakulyamba ameitaka jamii kuutumia vyema Usafiri wa bodaboda na bajaji badala ya kuvunja sheria kwa kuutumia kusafirisha bidhaa haramu na za magendo jambo ambalo litasababisha kuchukuliwa hatua za kisheria ikiwa ni pamoja na kufungwa jela.

Kamanda huyo wa Polisi alitoa rai hiyo juzi alipokuwa akifungua mafunzo kwa waendesha bodaboda wilayani Muheza kwenye hafla iliyofanyika ukumbi wa Tarecu akisema kuwa biashara hiyo iliyorasimishwa inapaswa kuonwa kama zilivyo kazi nyingine kwa wahusika kuziheshimu  ili kujijengea heshima kwa jamii.

Katika mafunzo hayo ya siku saba,kamanda Wakulyamba alisema wazee na vijana ambao wanaendesha bodaboda na bajaji ni vyema wakaheshimu kazi hiyo kama ilivyo kwa zile zinazofanyika ofisini badala ya kujihusisha na vitendo vya kusafirisha biashara haramu na zile za magendo na hivyo kusuguana na polisi.

Licha uya kuyasema hayo kamanda,Wakulyamba alisema,usafiri wa bajaji na bodaboda umerasimishwa na bunge la Jamhuri ya muungamno wa Tanzania lengo likiwa kuwawezesha wananchi kupata kipato halali na kuendesha maisha yao na kwamba kwa hatua hiyo haitakuwa vyema kuchezea kazi hiyo.

Aidha amesisitiza uzingatia sheria za barabarani kwa madereva bodaboda kuvaa kofia ngumi huku wakiepuka kubeba abiria kwa mtindo wa mshikaki mambo ambayo yanaweza kusababisha ajali na madhara mengine ambapo amewahimiza watumiaji hao wa vyombo vya moto kuanza kujitambua.

“Sio vyema usafiri huu ukatumika kusafirisha biashara haramu ama zile za magendo na ingependeza kama kazi hii mngeiheshimu kama ilivyo kazi za maofisini kwa vile ilirasimishwa na bunge letu ili kuweza kuwaingizia kipato halali,haitapendeza mkavunja sheria na kuanza kukimbizana na polisi”alisema.

Wakulyamba ametoa rai kwa bodaboda hao kutokuruhusu watu wengine kuichezea kazi yao huku akiyataja makosa yanaongoza kukamatwa kuwa ni kutokuvaa kofia ngumu ‘Helmenti’,kubeba abiria kwa mtindo wa mshikaki makosa ambayo imegundulika kuwa wanayafahamu kabla hata ya kukamatwa.

Kamanda huyo wa polisi pia alitumia fursa hiyo kuwaasa vijana kuacha kukaa vijiweni bila kazi huku wakikata tama za maisha na kujihusisha na vitendo vya uhalifu badala yake wajishughulishe na shughuli mbalimbali akitolea mfano wa kilimo hatua ambayo itawasaidia katika kumudu kujikwamua kiuchumi.

Pamoja na wito huo kwa vijana kamanda huyo amesema kuwa jeshi la polisi litaendelea kuimarisha vikundi vya ulinzi shirikishi jamii kwenye maeneo mbalimbali na kufanya doria za mara kwa mara lengo likiwa kudhibiti vitendo vya uhalifu huku akiwasihi vijana kujilinda dhidi ya vitendo vya uhalifu.

Naye mkaguzi mkuu wa polisi kitengo cha usalama barabarani wilayani Muheza,Herbert Kazonde amesema,changamoto kubwa iliyopo ni juu ya vijana hao kutokujiunga na vikundi vya bodaboda hivyo kuchangia uwepo wa makosa madogo madogo yapatayo 323 yaliyoweza kukusanywa sh 11.1 milioni.

Vilevile mkufunzi mwakilishi wa mafunzo hayo ya bodaboda kutoka APEC Jijini Dar es salaam,Masalu Ruge alisema kwamba lengo la mafuzno hayo ni kuhakikisha madereva wa bodaboda wanapata uelewa wa sheria kwa kuandaliwa na GEPF mfuko wa mafao ya kustaafu.
Mwisho.


 Pichani ni baadhi ya waendesha bodaboda wilayani Muheza wakiwafuatilia kamanda wa polisi mkoa wa Tanga,ambapo aliwataka kuitumia kazi hiyo kama ajira na kuacha kuitumia kufanya kazi haramu ikiwemo za magendo.
Pichani ambaye amevaa sare ya polisi na amesimama ni mkaguzi wa msaidizi wa polisi na mkuu wa kitengo cha usalama barabarani wilayani Muheza,Herbert Kazonde awali akielezea changamoto iliyopo ni vijana kuto kujiunga na vikundi vya bodaboda na kusababisha makosa madogo dogo 323 ya uvunjifu wa sheria.

 Pichani ambaye amesimama ni kaimu mkuu wa kituo wilaya ya Muheza,Oscar Jeshua akizungumzia mikakati iliyopo ili kukabiliana na uhalifu ikiwemo madereva wanaovunja sheria ya usalama barabarani,katikati ni kamanda wa polisi mkoa huo,Wakulyamba na kulia ni mkuu wa wa kitengo cha usalama barabarani,Sisiwaya.